ඇඟිලි ගහන යන්ත්‍ර පසෙක තබා සෞඛ්‍ය සේවකයින්ට කෝටි 3923ක් හොරට OT ගෙවලා  

සෞඛ්‍ය අමාත්‍යාංශය මගින් රජයේ රෝහල් සහ සෞඛ්‍ය ආයතන සඳහා රුපියල් කෝටි තුනකට වැඩි මුදලක් වැය කර ස්ථාපිත කර තිබූ ඇඟිලි සලකුණු යන්ත්‍ර 213 ක් භාවිතයට නොගෙන අක්‍රියව තිබියදී නීති විරෝධී ලෙස අනි කාල සහ නිවාඩු දින වැටුප් ලෙස රුපියල් කෝටි 3,923 ක් ගෙවා ඇතැයි ජාතික විගණන කාර්යාලය නිකුත් කළ වාර්තාවක සඳහන් වේ.

එම යන්ත්‍ර ක්‍රියාත්මක නොකරන්නේ නම් වර්තමාන වැටුපට අනුව අති කාල දීමනා නොගෙවීමට වග බලා ගත යුතු බවට භාණ්ඩාගාර ලේකම්වරයා පැහැදිලිව උපදෙස් දී තිබියදී, එම උපදෙස් උල්ලංඝනය කරමින් 2023 වර්ෂයේදී අති කාල සහ නිවාඩු දින වැටුප් ලෙස මෙම අති විශාල මුදල ගෙවා තිබූ බව ද එම වාර්තාව මගින් හෙළිදරව් කර තිබේ. .

මෙසේ අති කාල සහ නිවාඩු දින වැටුප් වෙනුවෙන් වැය කර තිබුණු මුළු මුදල වැටුප් පිරිවැයෙන් 72% ක් පමණ වූ බව ද ජාතික විගණන කාර්යාලය නිකුත් කළ එම වාර්තාවේ සඳහන් වේ.

සෞඛ්‍ය අමාත්‍යාංශයට අදාළව තිරසර සංවර්ධන දර්ශක තිස් එකෙන් දර්ශක දහ තුනක් සඳහා 2023 වර්ෂයට අදාළ ප්‍රගතිය වාර්තා කර නොතිබුණු බව පවසන ජාතික විගණන කාර්යාලය ප්‍රගතිය වාර්තා කරනු ලැබූ දර්ශක දොළහකට අදාළ දර්ශකවල අවශ්‍ය කාර්ය සාධන මට්ටම ළඟා කර ගෙන නොතිබුණු බව ද ප්‍රකාශ කරයි.

මේ අතර 2022 සහ 2023 වර්ෂවල රුපියල් කෝට් 2,200 ඉක්ම වූ වැඩි වටිනාකමක් සහිත ප්‍රසම්පාදන 663 කට අදාළ හදිසි ප්‍රසම්පාදන කර තිබූ නමුත් එම ප්‍රසම්පාදන එවකට සෞඛ්‍ය අමාත්‍යවරයා අමාත්‍ය මණ්ඩලයේ ආවරණ අනුමැතියට ඉදිරිපත් කර නොතිබූ බව ද ජාතික විගණන කාර්යාලය පවසයි.